Meer as 100% stem in Suid-Soedan
2011-01-24 12:27
Djoeba – Die tel van stembokse uit sekere areas van Suid-Soedan is gevries na meer as 100% van geregistreerde stemmers by stembusse opgedaag het.
Stembywoning was meer as 100% in tien van die land se 79 distrikte, het die Associated Press se analise van resultate op die referendumkommissie se webwerf bevind.
Die Suid-Soedannese Referendumkommissie het op hul webwerf aangekondig meeste stemme is reeds getel en 98,8% van stemmers het vir onafhanklikheid gestem.
Chan Reec Madut, hoof van die suidelike buro van die referendumkommissie, het gesê resultate waar meer as ‘n 105% opkoms opgemerk is, sal gekwarantyn word.
Selfs as die kommissie die oorskrydende stemme uitgooi, het die suide vir afskeiding gestem, het hy egter bygelas. “Die neiging is duidelik,” het hy gesê.
Die finale resultate van die referendum word in Februarie verwag.
Volg Nuus24 op Twitter.
- AP