Marokko trek joernalis se akkreditasie terug
2012-10-05 18:05
Rabat – Marokkaanse owerhede het besluit om die AFP-joernalis Omar Brouksy se media-akkreditasie terug te trek ná sy nuusdekking oor ‘n verkiesing in Tangier.
Die besluit is geneem ná ‘n storie wat Brouksy Donderdag geskryf het, waarin hy verwys na verkiesingskandidate wat “na aan die paleis is,” het Mustapha el-Khalfi, Marokko se minister van kommunikasie, gesê.
Die kandidate wie se eerlikheid bevraagteken is, is deel van die Authenticity and Modernity Party. Die party is gestig deur Fouad Ali El Himma, ‘n raadgewer vir die koning.
Khalfi het enige verband tussen die kandidate en die paleis ontken.
Die regering het in ‘n verklaring gesê dat die storie onprofessioneel is en het bygevoeg dat daar bewerings in die storie is dat die monarg by die verkiesing inmeng.
Die aantygings is glo ongegrond en onverantwoordelik.
Philippe Massonnet, AFP se nuusredakteur, het Marokkaanse owerhede gevra om die besluit te heroorweeg.
“Die berig het nie ‘n agenda gehad nie en wou net die situasie omskryf, sonder die bedoeling om iemand leed aan te doen,” het Massonnet gesê.
– Volg Nuus24 op Twitter
- Sapa - AFP
