Man vas na moord op Gay-aktivis
2011-02-03 11:29
Londen – Ugandese polisie het ‘n man in hegtenis geneem in verband met die moord op David Kato, ‘n gay-aktivis wat verlede jaar in ‘n koerantberig met die opskrif “Hang hulle” verskyn het.
Volgens Judith Nabakooba, 'n nasionale polisiewoordvoerder, het die man erken dat hy die moord gepleeg het.
Die polisie sê Enock Nsubug was een van twee verdagtes in die saak.
Hulle ontken egter Kato is vermoor oor sy seksuele voorkeur en ondersoek ‘n saak van roof.
Homoseksuele dade is onwettig in Uganda en oortreders kan met tot 14 jaar tronkstraf gevonnis word.
Uganda se Rolling Stone-koerant het 29 foto’s gepubliseer met die name en adresse van “oortreders.”
Die eerste artikel, waarin Kato verskyn het, het onder die kop “Hang hulle” verskyn.
Internasionale leiers soos Barack Obama, die Amerikaanse president, Rowan Williams, die aartsbiskop van Canterbury en Navi Pillay, die VN se hoë kommissaris vir menseregte, dring daarop aan dat 'n volledige ondersoek na die saak gedoen moet word.
Lees die volledige storie hier.
Volg Nuus24 op Twitter.
-SAPA