Mali-krisis: VN gaan resolusie aanvaar

2012-10-12 09:47

New York – Die VN se Veiligheidsraad is gereed om ‘n resolusie vanaf die Franse regering te aanvaar wat vra dat internasionale militêre ingryping in Mali moet plaasvind.

Die resolusie soek ‘n gedetailleerde plan vir militêre ingryping in die geweld geteisterde Noord-Mali.

Daar word verwag dat die VN die resolusie nog op Vrydag kan aanvaar.

Na die planne vir die militêre ingryping ingedien word, moet die Veiligheidsraad steeds ‘n tweede resolusie aanvaar om die ontplooiing die groenlig te gee. Die besluit word eers teen November verwag.

Mali is Maart in chaos gedompel toe rebelle die presidensie omvergewerp het en beheer oor die noordelike dele van die land oorgeneem het.

Die resolusie eis dat die land se amptenare en rebellegroepe so gou as moontlik met onderhandelings moet begin.

Mali het die Verenigde Nasies al voorheen gevra om onmiddellik ‘n mandaat goed te keur wat internasionale magte sal toelaat om te help om die noordelike deel van die land terug te wen.

‘n Vergadering sal 19 Oktober gehou word saam met verteenwoordigers van Ecowas, die Afrika Unie, die Europese Unie en die VN, in ‘n poging om ‘n samehangende strategie te ontwikkel, het ‘n amptenaar bevestig.

– Volg Nuus24 op Twitter
 

- SAPA