Mali: Ekstremiste teiken vroue, kinders
2012-10-11 12:23
New York – Esktremiste in Noord-Mali is besig om verskeie menseregte te skend en betaal families vir hul kinders om soldate te word, het ‘n Verenigde Nasies-amptenaar Woensdag gesê.
Ivan Simonovic, die VN se assistent sekretaris-generaal vir menseregte, het gesê rebelle is besig om lojaliteit te koop deur belasting af te skaf en geld te gee vir vroue en kinders. Die meeste mense in Mali leef op $1,25 (sowat R11) per dag.
Mali is Maart in chaos gedompel toe rebelle die presidensie omvergewerp het en beheer oor die noordelike dele van die land oorgeneem het.
Simonovic, wat met regeringsamptenare, gemeenskapsleiers en verplaasdes ontmoet het tydens ‘n onlangse besoek, sê dat die rebelle musiek en rook verban het en dat vroue nie te veel werk mag doen nie en ten alle tye volledig bedek moet wees.
“Dit is skrikwekkend om te hoor van lyse wat opgestel word oor ongetroude vroue wat of swanger is of wat kinders het. Ons weet nie wat met die vroue gaan gebeur nie.”
Hy het bygevoeg dat gedwonge huwelike toeneem, met ‘n vrou wat jou minder as $1 000 (sowat R8 600) uit die sak sal jaag.
Simonovic het bygevoeg dat sowat ‘n derde van die bevolking in Noord-Mali gevlug het. Sowat ‘n 100 000 vlugtelinge is in Burkina Faso, 100 000 in Mauritanië, 30 000 in Algerië en 40 000 in Niger.
“Veral kinders is baie kwesbaar in die noorde. Daar word elke dag van hulle by die rebelle aangesluit. Hulle gesinne word sowat $600 (sowat R5 200) betaal vir hul dienste.”
– Volg Nuus24 op Twitter
- Reuters
