Malawiese president weier om tuig neer te lê
2011-07-22 10:40
Blantyre – Bingu wa Mutharika, die president van Malawi, het Donderdag gesê hy weier om die tuig neer te lê nadat daar volgens berigte 14 mense dood is tydens opstande in twee groot stede.
Die polisie moes ontplooi word om betogers onder beheer te bring nadat dit in grootskaalse plundery ontaard het.
Die geweld is internasionaal veroordeel, onder andere deur Ban ki-Moon, die sekretaris-generaal van die Verenigde Nasies.
Soldate is na woongebiede rondom Lilongwe, die hoofstad, en Blantyre gestuur om sowat 2 000 betogers te dwing om terug na hulle huise te keer.
Mutharika word daarvan beskuldig dat hy die ekonomie wanbestuur en dat hy burgers se demokratiese regte vertrap.
Die president (77), wie se tweede termyn in Mei 2009 begin het, het gesê hy “sal aanhou om die land te regeer. Soos wat daar in die grondwet gesê word, lê die gesag om die land te regeer in my hande en niemand anders s’n nie.”
– Volg Nuus24 op Twitter.
- Sapa - AFP