Malawiese gay paartjie ‘skei’
2010-06-08 20:10
Blantyre - Die Malawiese gay paartjie wat in die tronk beland het oor hulle huwelikseremonie, het Dinsdag bekend gemaak dat hulle na ses maande van getroude lewe geskei het.
Dié paartjie het wêreldwyd opspraak gemaak toe hulle tot 14 jaar tronkstraf gevonnis is vir onsedelikheid en onnatuurlike dade. Dít kom nadat hulle ‘n simboliese troue gehad het.
Tiwonge Chimbalanga (20) en Steven Monjeza (26) het sowat 14-jaar tronkstraf in die oë gestaar, maar is deur hul president Bingu wa Mutharika vrygelaat.
Slegs twee weke na hul vrylating het hul bekend gemaak dat hulle die verhouding beëindig het.
“Ek is nie meer verlief op Tiwonge nie. Ek is verlief op ‘n vrou genaamd, Dorothy Gulo,” het Monjeza aan AFP gesê.
“Ek beplan nou iets vir my toekoms saam met Dorothy,” het hy gesê.
Volgens Chinbalanga het hy uitgevind van Monjeza se besluit in ‘n plaaslike koerant.
“Hy kan trou met wie hy wil. Ek sal nog die man van my drome vind. Ek bly steeds gay,” het hy gesê.
Volg Nuus24 op Twitter.
- Sapa - AFP