MDC soek nuwe verkiesing vir Zim
2010-02-09 22:22
Johannesburg – Volgens die Beweging vir Demokratiese Verandering (MDC) is ‘n nuwe verkiesing die enigste oplossing vir Zimbabwe.
Austin Moyo, MDC-voorsitter in Suid-Afrika, het Dinsdag die media toegespreek in Braamfontein, Johannesburg en gesê dat die SADC (Southern African Development Community) die nuwe verkiesing so gou moontlik moet organiseer.
Die toespraak is gehou aangesien Suid-Afrikaanse onderhandelaars terug sou gaan na Harare in ‘n poging om probleme in die koalisieregering uit te stryk.
“Hierdie (verkiesing) moet begin word deur ‘n nuwe grondwet en verkiesingswet,” het Moyo gesê.
Volgens Moyo het plaasaanvalle in Zimbabwe toegeneem en Zanu-PF probeer om mag vanaf premier Morgan Tsvangirai weg te neem.
Die koalisie-ooreenkoms, wat Donderdag ‘n jaar oud sal wees, het gesê dat ‘n nuwe grondwet in plek moet wees voordat ‘n nuwe verkiesing mag plaasvind.
Dié ooreenkoms het gestipuleer dat die grondwet binne 18 maande gefinaliseer moet word. Maar Moyo voer aan Zanu-PF vertraag die finalisering hiervan.
Die rede hiervoor, volgens Moyo, is omdat die huidige grondwet in Zanu-PF se guns tel.
Moyo wil hê dat die Suid-Afrikaanse delegasie moet aandring op die finalisering van die nuwe grondwet.
- Sapa