MDC ook kwaad vir Malema
2010-04-01 15:14
Johannesburg – Julius Malema, president van die ANC-jeugliga (ANCYL), het ‘n Zimbabwiese politieke party ontstel tydens ‘n onlangse besoek aan Harare.
Die Beweging vir Demokratiese Verandering (MDC) is glo ontsteld omdat Malema tydens sy besoek slegs met Robert Mugabe se Zanu PF-party gekommunikeer het.
“Is Malema besig om te sê dat die ANC nie demokrasie respekteer nie?” het Austin Moyo, voorsitter van die MDC in Suid-Afrika, gesê.
“Verstaan Malema dat daar miljoene vryheidshelde in die MDC is?”
Volgens Moyo het Malema dit duidelik gemaak dat hy Zanu-PF sal besoek omdat hulle ‘n “revolusionêre party” is.
“As Malema slegs met een party kommunikeer, sal dit die verkeerde boodskap uitstuur,” het Moyo gesê.
- Sapa