MDC juig ná hof Roy Bennett vryspreek
2010-05-11 12:01
Harare – Roy Bennett, ’n wit boer en aangewese adjunkminister van landbou van Zimbabwe, is Maandag vrygespreek op alle aanklagte wat wissel van hoogverraad tot terrorisme en rampokkery.
Bennett, wat kort voor hy in Februarie verlede jaar ingehuldig sou word op ’n klein lughawe buite Harare in hegtenis geneem is omdat hy die land kwansuis onwettig wou verlaat, is deur regter Chinembiri Bhunu vrygespreek.
Die staat se saak teen Bennett is gelei deur Zimbabwe se prokureur-generaal, Johannes Tomana.
Dit het onder meer verband gehou met wapens wat na bewering in die 1990’s op Bennett se plaas gevind is en waarvoor hy lang tye in verskeie tronke moes deurbring.
“Die staat se eie hoofgetuie het teen die staat gedraai en die beskuldigde se saak gesteun,” het Bhunu gesê.
“Nóg ’n sleutelgetuie, die staat se tegnologie-deskundige (Perekayi Mutsetse), se getuienis was twyfelagtig. Die beskuldigde is onskuldig.”
Bennett is dadelik deur ondersteuners omring en buite die hof het ’n skare hom met dreunsang begroet.
“Ons word reeds jare lank vervolg, maar is nou sterker as ooit te vore.
“Ek gaan my stryd om ’n beter Zimbabwe voortsit,” het ’n verheugde Bennett aan omstanders gesê.
Die Beweging vir Demokratiese Verandering (MDC) het Maandag ná die uitspraak daarop aangedring dat Bennett Dinsdag as adjunkminister ingehuldig word.
Pres. Robert Mugabe het tot dusver geweier om Bennett in te huldig omdat die saak teen hom hangende was.
Die saak teen Bennett was daarom een van die struikelblokke in die pad van ’n volledige skikking tussen die MDC en Mugabe se Zanu-PF.
Een van die ander was Tomana se rol as prokureur-generaal in die vervolging van MDC-ondersteuners en die versnelde oorname van wit boere se plase sedert die Zimbabwiese skikking.
Bennett self het Maandag aangedui dat hy bereid is om as adjunkminister terug te staan as sy aanstelling ’n struikelblok bly.
“Ons kan nie toelaat dat ’n enkele pos keer dat die proses vorder nie,” het hy gesê.
- Die Burger
Kliek hier om na 'n eksklusiewe onderhoud met Bennett ná die uitspraak te luister.