Lojaliste spartel vir oulaas onder bloedige aanslag
2011-09-26 08:10
Sirte – Navo-bomwerpers het dié stad Sondag laat deurloop om die pad oop te maak vir vegters van die Libiese oorgangsregering wat probeer om kol. Muammar Gaddafi se tuisdorp oor te neem.
Gaddafi-lojaliste het egter gewys hulle hou steeds ’n bedreiging in met ’n aanval op die oasedorp Ghadames in die woestyn naby die grens met Algerië.
Die Nasionale Oorgangsraad het gesê hy kon die aanvalle afweer, maar volgens berigte duur die gevegte voort.
Vroeër die naweek het magte van die oorgangsraad Sirte diep binnegedring, maar later teruggetrek vir aanvalle deur Navo-vegvliegtuie.
“Sondag het ons vryheidsvegters die stad Sirte van twee kante aangeval. Dit beteken nie Sirte is vry nie, maar is ’n aanduiding Sirte gaan binnekort vry wees,” het Ahmed Bani, ’n militêre woordvoerder van die oorgangsraad in Tripoli, gesê.
“Ek vra dat alle milisielede wat aan die kant van die tiran veg, besef die stryd is verby.”
In ’n verklaring Saterdag het Navo gesê aanvalle het onder meer twee bevel- en beheerfasiliteite, ’n militêre oefenterrein, ’n stoorbunker, radarfasiliteit en 29 pantserkarre getref.
Die val van Sirte sal ’n enorme pluimpie vir die oorgangsraad wees in sy veldtog om hom as regering te vestig, en ’n terugslag vir Gaddafi, wat voortvlugtig is.
Volgens vegters van die oorgangsraad en burgerlikes wat uit Sirte gevlug het, blyk dit dat Gaddafi-lojaliste burgerlikes probeer aankeer en hulle as menslike skilde gebruik.
“Gaddafi se magte het die gebied omsingel en afgesny deur op mense te skiet,” het ene Youssef, wat saam met sy vrou uit die stad gevlug het, gesê. “Baie mense wil wegkom, maar hulle kan nie.”
Dit is bevestig deur ’n ander man genaamd Aboebakr, wat met sy vrou en vier kinders uit Sirte gevlug het.
“Die omstandighede is nie goed nie, regtig, dis nie goed nie. Dis aaklig. Daar is (pro-Gaddafi-) bendes wat op mense skiet. Dit is regtig erg.”
’n Maand ná die val van Tripoli ondervind die oorgangsraad nog net weerstand in twee sentrums, Sirte en Bani Walid, ’n dorp sowat 170 km suidoos van Tripoli.
Pogings om Bani Walid oor te neem, het misluk, en daarom fokus die oorgangsraad se magte op Sirte.
“Die simboliese waarde van ’n oorwinning in Sirte sal baie groter wees as die inname van Bani Walid,” het Geoff Porter, ’n onafhanklike Amerikaanse kenner van Noord-Afrika, gesê.
“Die val van Gaddafi se tuisstad sal weergalm onder die bittereinders en kan die val van Bani Walid vergemaklik.”
Die voorsitter van die oorgangsraad, Mustafa Abdel Jalil, het die naweek gesê die regeringsmagte het vermeende verbode wapens naby Sabha, diep in die Saharawoestyn, en by Waddan naby Sirte gevind.
Volgens die Verenigde Nasies is hulle al geruime tyd bewus dat Gaddafi mosterdgas en onverwerkte uraan naby Sabha geberg het.
– Die Burger
– Volg Nuus24 op Twitter.
- Reuters