Libiese wapens dalk in terroriste se hande
2011-11-15 10:37
New York – Die Libiese krisis het ‘n negatiewe invloed op sekerheid in Sentraal-Afrika gehad, het Ban Ki-moon, die sekretaris-generaal van die Verenigde Nasies, Maandag in ‘n verslag gesê.
Die verspreiding van wapens wat aan Muammar Gaddafi se regime behoort het, is onder andere deur Ban Ki-Moon as 'n probleem uitgesonder.
Afrika-leiers is bekommerd oor die moontlikheid dat wapens in al-Kaïda se tak in die Maghreb in Noord-Afrika kan beland. Dit sal “die terroriste-groep in staat stel om sy aktiwiteite na ander sub-streke in Sentraal-Afrika te versprei,” is in die verslag gesê.
Daarmee saam het die Lord’s Resistance Army (LRA) van Uganda in talle lande in Sentraal-Afrika tot spanning bygedra. LRA-troepe is reeds telkemale uitgewys vir hulle gruweldade teen burgerlikes.
Duisende migrante werkers van Libië het intussen na hulle tuislande teruggekeer, wat ook die ekonomie en samelewing in Sentraal-Afrika beïnvloed het.
“Die onlangse terugkoms van mense uit Libië kan die las van die gemeenskappe waar hulle gehuisves word aansienlik meer maak. Dit kan ook spanning in daardie gemeenskappe veroorsaak,” lui die verslag.
– Volg Nuus24 op Twitter.
- Sapa-DPA