Libiese vlugtelinge onderweg na Tsjad
2011-10-04 10:53
Genève – Meer as 1 200 mense wat al weke lank in Sabha in die suide van Libië in haglike omstandighede woon, is nou na Tsjad onderweg, het die Internasionale Organisasie van Migrasie (IOM) Maandag gesê.
Soveel as 3 000 mense is die laaste weke in Sabha vasgekeer terwyl die stryd om beheer oor Libië voortduur.
Vegters van die Nasionale Oorgangsraad (NOR) het magte lojaal aan Muammar Gaddafi bykans twee weke gelede reeds uit die gebied verdryf.
“’n Konvooi van 15 voertuie en 1 206 mense het Sondag na Gatroun vertrek en is nou onderweg na Tsjad,” het Jemini Pandya, ‘n IOM-woordvoerder, gesê.
Die NOR het in Augustus Gaddafi se regering omvergewerp en Tripoli, die hoofstad, oorgeneem. Gaddafi en van sy seuns is steeds soek en sy lojaliste het nog beheer oor Sirte, sy tuisstad, en Bani Walid.
– Volg Nuus24 op Twitter.
- Reuters