Libiese rebelle trek op na Gaddafi se tuisstad
2011-08-29 14:47
Tripoli – Libiese rebelle wat deur Navo gesteun word is aan die buitewyke van Muammar Gaddafi se tuisstad, Sirte, berig RSG.
Die rebelle is glo van alle kante besig om die laaste vesting van Gaddafi te beleër om sodoende volle beheer oor Libië te kry.
Alhoewel dit onbekend is waar Gaddafi hom tans bevind, word daar bespiegel dat hy in Sirte is.
Die rebelle het stelling ingeneem sowat 30 km vanaf dié dorp af.
“Daar word met stamhoofde in Sirte onderhandel vir 'n vreedsame oorgawe,” het Mohammed al-Fortiya, ‘n bevelvoerder van die Nasionale Oorgangsraad, gesê.
Hy het ook gesê dat die onderhandelinge net met stamhoofde gedoen word en dat daar, volgens sy kennis, geen direkte kontak met Gaddafi gemaak is nie, het SAPA berig.
Hy het bygevoeg dat die onderhandelings nie vir ewig sal aanhou nie. “Ons wil Libië so spoedig moontlik verenig.”
Navo-vliegtuie het die afgelope paar dae in Sirte meer as 50 militêre voertuie, twee skuilings en 'n militêre waarnemingspunt vernietig.
– Volg Nuus24 op Twitter.
– RSG, SAPA
- SAPA