Libiese leiers in gesprekke in Tunisië
2011-06-27 21:04
Tunis – Drie ministers van die Libiese regering is in Tunisië vir gesprekke met internasionale partye oor pogings om die konflik in hul land stop te sit, het Tunisië se amptelike nuusagentskap TAP Maandag berig.
Daar is berig dat die minister van gesondheid, Mohammed Hijazi, en die minister van sosiale betrekkinge, Ibrahim Sherif, Sondag in Jerba in die suide van die land aangekom het, waar gesprekke onderweg was.
Hulle het aangesluit by die minister van buitelandse sake, Abdelati al-Obeidi, wat sedert verlede Woensdag in Tunis is en “in onderhandelinge met verskeie buitelandse partye” was, het TAP berig.
Alain Juppe, die Franse minister van buitelandse sake, het Sondag gesê “kontak vind plaas” tussen Gaddafi se regime en rebelle. Dit hou glo verband met die Libiese leier se toekoms.
‘n Senior amptenaar wat Libië se rebelle verteenwoordig het gesê hulle verwag om “binnekort” ‘n aanbod van Gaddafi te ontvang wat moontlik ‘n einde aan die oorlog van vier maande kan bring.
Abdel Hafiz Ghoga, die adjunkvoorsitter van die rebelle se Nasionale Oorgangsraad (NOR), het gesê bemiddelaars het aangedui dat ‘n voorstel van die Libiese leier in die pyplyn is.
Die NOR was nie in direkte gesprekke met Gaddafi nie, maar het deur kontakte met Frankryk en Suid-Afrika verneem dat ‘n aanbod voorberei word, het hy gesê.
– Volg Nuus24 op Twitter
- SAPA