Libië: Rebelle moet gevangenes só behandel
2011-05-31 09:17
Benghazi - Die rebelle-administrasie wat ‘n groot deel van die ooste van Libië beheer is besig om riglyne te versprei oor hoe rebelle-soldate oorlogsgevangenes moet behandel.
Die riglyne kom nadat die rebelle daarvan beskuldig is dat hulle onwettige arrestasies gemaak het, gevangenes mishandel en Afrikane uit die sub-Sahara-gebied, wat verdink is daarvan dat hulle huursoldate is, vermoor het.
Die rebelle hou glo 300 gevangenes aan, insluitend tien buitelanders, volgens Salwa Fawzi al-Deghali, ‘n beampte van die Nasionale Oorgangsraad.
Die rebelle het gesê hulle wil verseker dat hierdie gevangenes en toekomstige gevangenes behandel word volgens die vereistes van die Geneefse Konvensies oor die humanitêre behandeling van gevangenes en ander slagoffers van oorlog.
Die feit dat die rebelle so min gevangenes aanhou, is kommerwekkend omdat hulle vroeër gepraat het van talle beweerde huursoldate uit sub-Sahara Afrika wat hulle gevang het.
Die rebelle het Muammar Gaddafi, die Libiese leier, daarvan beskuldig dat hy duisende huursoldate in Libië ingebring het en hulle lot bly ‘n ope vraag.
- Volg Nuus24 op Twitter.
- Sapa - AP