Libië: Rebelle dalk skuldig aan oorlogsmisdade
2011-09-13 10:02
Brussels – Die rebelle wat geveg het om Muammar Gaddafi se Libiese regering omver te werp, het onwettig moord gepleeg en mense gemartel, het Amnestie Internasionaal Dinsdag in ‘n verslag gesê.
Die verslag van meer as 100 bladsye is gebaseer op ‘n ondersoek in Libië oor ‘n tydperk van drie maande. Dit het nié die misdade van die rebelle met dié van die Gaddafi-magte vergelyk nie.
Die Gaddafi-magte se misdade was erger en die lys was langer en glo in sekere gevalle gelykstaande aan misdade teenoor die mensdom, luidens die verslag.
Die misdade van die rebelle kan egter ook nie as gering beskou word nie, meen die organisasie.
“Lede en ondersteuners van die opposisie het ook menseregte geskend. In sekere gevalle kom dit neer op oorlogsmisdade hoewel op ‘n kleiner skaal,” het Amnestie in die verslag gesê.
Volgens die verslag het die opposisie-ondersteuners tussen April tot vroeg in Julie “onwettig” talle Gaddafi-lojaliste en veiligheidsbeamptes “gedood.” Nadat die rebelle beheer van die ooste van Libië gekry het, het ondersteuners van die rebelle soldate en verdagte huursoldate “geskiet en gehang.”
Mohammed al-Alagi, die Nasionale Oorgangsraad se minister van justisie, het gesê om die rebelle se aksies as oorlogsmisdade te beskryf, verkeerd is.
“Hulle is nie die weermag nie, hulle is slegs gewone mense,” het al-Alagi gesê.
Hy het erken dat die rebelle foute kon gemaak het, maar hy meen dat dit nie “enigsins as oorlogsmisdade” beskryf kan word nie.
– Volg Nuus24 op Twitter.
- Sapa - AP