Libië: Drie polisielede in kusdorpie geteiken
2012-10-04 10:23
Susa, Libië – Radikale Islamiete het drie Libiese polisielede om die lewe gebring toe hulle op die beamptes se beheerpunt naby 'n kusdorpie oos van die stad Benghazi toegeslaan het.
"Die drie mans is dood weens skietwonde in die kop en bors," het 'n mediese beampte aan die nuusagentskap AFP gesê.
Die beampte, wat nie sy naam bekend wou maak nie, het bygevoeg dat 'n vierde polisielid in 'n kritieke toestand is.
Inwoners sê die vier mans het by 'n beheerpunt by die westelike hek van Susa, wat in die Groen Gebergtes ongeveer 260 km oos van Benghazi lê, diens gedoen.
Hulle is in die nag deur Islamitiese ekstremiste aangeval, het die polisie en plaaslike inwoners gesê.
"Voorlopige ondersoeke dui daarop dat ekstremiste agter hierdie aanvalle is," het Nasser Zayed, 'n polisiehoof, gesê.
– Volg Nuus24 op Twitter.
- Sapa - AFP
