Libië: 718 burgers dood in Navo-aanvalle
2011-06-01 11:18
Tripoli - Libië het Dinsdag Navo daarvan beskuldig dat hulle 718 burgers vermoor en 4 067 beseer het in tien weke van lugaanvalle op Muammar Gaddafi se regime.
Intussen het pogings om die krisis op te los deur die Afrika Unie tot ‘n stilstand gekom en is Italië van mening dat Muammar Gaddafi se regering “verby” is.
Die dodetal en hoeveelheid beseerdes is tydens ‘n mediakonferensie in Tripoli deur Mussa Ibrahim, die regeringswoordvoerder, bekend gemaak. Hy het ook gewaarsku dat sou Gaddafi die land verlaat, dit die ergste ding kan wees wat met Libië gebeur.
“Vanaf 19 Maart tot 26 Mei was daar reeds 718 martelaars onder burgerlikes en 4 067 is beseer, waarvan 433 baie ernstige gevalle is,” het Ibrahim gesê. Die getalle kon egter nog nie bevestig word nie.
Hy het gesê die getalle sluit nie Libiese militêre gevalle in nie. Die departement van verdediging wou egter ook nie bekend maak hoeveel militêre beamptes reeds in dié oorlog dood is nie.
“As Gaddafi moet gaan, sal sekuriteit in die land verdwyn,” het Ibrahim gesê. Hy het gesê dit is buite die kwessie dat Gaddafi uittree.
“Gaddafi se uittrede sal ernstige gevolge vir Libië inhou,” en hy het ook gewaarsku teen ‘n burgeroorlog.
Ibrahim het ontken dat Jacob Zuma, die Suid-Afrikaanse president, Maandag in Tripoli ‘n “uitgangsplan” met Gaddafi bespreek het.
“Zuma het nooit enige uitgangsplanne met hom bespreek soos in die media beskryf is nie,” het hy gesê.
In ‘n verklaring van die Suid-Afrikaanse presidensie in Pretoria is daar gesê dat Gaddafi Libië nie gaan verlaat nie ondanks stygende internasionale druk en intenser Navo-aanvalle op sy regime.
- Volg Nuus24 op Twitter.