LRA-rebellegroep dalk op laaste bene
2010-11-03 14:07
Owerhede in Uganda sê die aantal soldate in die berugte rebellebeweging die Lord’s Resistance Army (LRA) het verminder tot slegs ‘n paar honderd.
Hierdie rebellegroep kan binnekort iets van die verlede sal wees solank dit geen ondersteuning van eksterne groepe ontvang nie.
“Die LRA het tans sowat 400 vegters, minder as die helfte as wat dit sowat twee jaar gelede gehad het”, het Felix Kulayigye, Uganda se militêre woordvoerder, gesê.
Volgens Kulayigye is die syfers verskaf deur die groep Enough Project, wat gebaseer is op onderhoude wat met meer as vyf dosyn voormalige LRA-troepe gevoer is.
Kulayigye meen die LRA se vegters is selfs minder as die getal wat deur Enough Project berig word en staan tans op slegs 200.
In 2003, toe die LRA op sy sterkste was, het dit sowat 3 000 troepe gehad.
Owerhede in Uganda is al sedert 2008 op die LRA, onder leiding van Joseph Kony, se spoor.
In Mei vanjaar het die groep 36 mense in die Sentraal-Afrika Republiek (SAR) vermoor en 10 000 dakloos gelaat.
Volg Nuus24 op Twitter.
- SAPA