'Krisis in Libië vererger' – VN
2011-05-19 13:48
Tripoli – Ban Ki-moon, hoof van die Verenigde Nasies (VN), het aan AFP gesê die humanitêre krisis in Libië is besig om erger te raak.
Ban het ook aan die nuusagentskap gesê dat ‘n skietstilstand in die land nie verseker kon word nie.
Die sekretaris-generaal van die VN het tydens ‘n onderhoud in New York gesê sy spesiale gesant aan Libië, Abdul Illah al-Khatib, “werk baie hard”.
Pogings om Muammar Gaddafi te oortuig om ‘n skietstilstand aan te kondig het egter geen vordering gemaak nie.
Ban het ook gewaarsku dat die "humanitêre situasie" in Libië “agteruitgaan” en dat die “krisis vererger.”
Hy sê hy is veral bekommerd oor die stad Misrata waar honderde mense reeds doodgemaak is.
“Die situasie word baie erg,” het Ban gesê.
Die VN-hoof se opmerkings kom nadat vier joernaliste – twee Amerikaners, een Brit en een Spanjaard – deur Libiese owerhede vrygelaat is.
Volg Nuus24 op Twitter.
- AFP