Kommer oor moorde, marteling in Nigerië

2012-11-03 07:35

Lagos – Jong Nigeriese mans is deur die weermag in Maiduguri doodgeskiet tydens 'n klopjag op rebelle, het inwoners van die stad gesê.

‘n Imam het aan die BBC gesê dat 11 jeudiges in sy straat alleen om die lewe gebring is, insluitend vier van sy seuns.

Die menseregtegroep Amnestie Internasionaal beskuldig die Nigeriese weermag die afgelope tyd daarvan dat klopjagte teen rebelle in die land onnodig wreed is.

‘n Woordvoerder van die weermag het gesê hy is nie bewus van die voorvalle nie.

Maiduguri is 'n vesting van die rebelle-groep Boko Haram.

Amnestie Internasionaal het in ‘n verslag Donderdag gesê dat die weermag erge geweld tydens hul klopjagte teen dié rebelle gebruik. Hulle vermoor glo onskuldige burgerlikes, martel rebelle en brand hul huise af.

– Volg Nuus24 op Twitter