Kommer oor DRK-eleksie
2011-11-28 07:00
Kinshasa. – Internasionale organisasies het ’n beroep om kalmte gedoen op die vooraand van die presidentsverkiesing in die Demokratiese Republiek van die Kongo.
In die aanloop tot die verkiesing het dodelike straatgevegte in dié mineraalproduserende land plaasgevind en is voorbereidings vertraag.
Daar is kommer oor of dié Sentraal-Afrika-land gereed is vir sy tweede ná-oorlogse presidentsverkiesing en oor die uitwerking wat ’n bestrede uitkoms kan hê op pogings om land te stabiliseer.
Die Europese Unie en die Verenigde Nasies het ’n beroep om beheerstheid gedoen nadat minstens drie mense eergister, op die laaste dag van verkiesingsveldtog, gesterf het en die hoofteenstander gesê het hy sou gister ’n byeenkoms hou ondanks ’n verbod op politieke byeenkomste op die dag voor die stemming.
“Die veiligheidsmagte moet hulle weerhou van enige optrede wat spanning kan vererger en moeilikheid kan veroorsaak voor die verkiesing,” het Mounoubai Madnodje, woordvoerder van die VN-vredesmissie, gesê.
Verkiesingsbeamptes in die DRK het geskarrel om die laaste stembriewe betyds by stempunte te kry ná vertragings in alle stadiums van die proses.
Die hoof van die verkiesingsliggaam het egter gesê hy verwag dat die verkiesing soos beplan sal voortgaan.
“Ons wil die versekering gee dat 99% van dinge volmaak werk; ons verbind ons daartoe,” het Daniel Ngoy Mulunda, hoof van die verkiesingskommissie, Sondag op ’n mediakonferensie in Kinshasa gesê.
Die EU-waarnemersmissie het die polisie daarvan beskuldig dat hulle Etienne Tshisekedi, hoofteenstander van pres. Joseph Kabila, sy reg op ’n veldtog in die hoofstad ontneem nadat veiligheidsmagte sy pad eergister op die lughawe versper het.
Die polisie het byeenkomste vroeër verbied nadat geweld eergister in Kinshasa uitgebreek het.
Die bevestigde dodetal ná die geweld het tot drie gestyg, is berig.
– Volg Nuus24 op Twitter
- Reuters