Kenia bal vuis teen rebelle in Somalië

2012-09-26 15:27

Nairobi – Kenia se weermag sê sy vegvliegtuie het 'n bomaanval op Somalië se lughawe in Kismayo uitgevoer, waar Islamitiese militante hulle wapens geberg het.

Die rebellegroep al-Shabaab skuil tans in dié hawestad.

‘n Al-Shabaab-woordvoerder sê niemand is in die aanval dood nie en geen eiendom is beskadig nie, het BBC News berig.

Keniaanse soldate probeer saam met magte van die Afrika-unie om weer algehele beheer oor Somalië te neem.

Al-Shabaab, wat die afgelope jaar vanuit die stad Mogadisjoe en verskeie ander dorpe gewerk het, is steeds in beheer van verskeie stede en dorpe in Suid-Somalië.

Sowat 10 000 mense het die afgelope week uit Kismajo gevlug.

Kenia het sowat ‘n jaar gelede by die situasie in Somalië ingegryp na verskeie grens-aanvalle in Kenia plaasgevind het.

– Volg Nuus24 op Twitter
 

- AFP