Kenia arresteer 2 vermeende Shabaab-lede
2011-10-28 14:40
Nairobi – Twee Keniaanse mans is Vrydag daarvan beskuldig dat hulle deel is van die al-Shabaab-rebellegroep teen wie Kenia twee weke gelede ‘n militêre sending begin het.
Omar Muchiri en Stephen Macharia, beide Keniane, het die beskuldigings ontken. Hulle het ook ontken dat hulle medepligtiges is van Elgiva Bwire Oliacha, ‘n Keniaan wat Woensdag erken het hy is 'n lid van al-Shabaab.
Al drie is vandeesweek in hegtenis geneem nadat die Keniaanse polisie veiligheid in die land opgeskerp het. Dit kom nadat al-Shabaab gedreig het om teenaanvalle in Nairobi uit te voer omdat Kenia Somalië binne geval het opsoek na die rebelle.
Vroeër die week het twee bomaanvalle Kenia se hoofstad, Nairobi, geruk. Een persoon is in die aanval dood en talle is beseer.
Al-Shabaab het nie verantwoordelikheid vir dié aanvalle geneem nie.
– Volg Nuus24 op Twitter.
- Sapa - AFP