Kenia, Soedan bespreek hofbevel vir Bashir se arrestasie
2011-12-01 16:56
Nairobi – Kenia se minister van buitelandse sake het Donderdag na Soedan gegaan om ‘n diplomatieke geskil te ontlont nadat ‘n Keniaanse hof beveel het die Soedannese president moet in hegtenis geneem word as hy Kenia weer besoek.
Pres. Omar al-Bashir van Soedan word beskuldig van vermeende volksmoord.
Soedan het beveel dat Kenia se ambassadeur Kartoem moet verlaat en het sy eie gesant van Nairobi af laat terugkom.
Die besluit kom nadat ‘n regter aan die Keniaanse regering gesê het dat Bashir in hegtenis geneem moet word indien moontlik. Daarna moet hy aan die internasionale strafhof (ISH) in Den Haag oorhandig word sodat hy vervolg kan word. Die ISH het ‘n lasbrief vir die inhegtenisname van al-Bashir reeds ‘n geruime tyd terug uitgereik.
Die Keniaanse regering het egter gesê hy beplan om teen die hof se beslissing te appelleer. Soedan het ook aangedui dat hy oop is vir ‘n diplomatieke resolusie en het nog nie die Keniaanse ambassadeur gedwing om die land te verlaat nie.
Moses Wetangula, die Keniaanse minister van buitelandse sake, sal Donderdag vir Bashir in Kartoem ontmoet om ‘n oplossing te bespreek, het ‘n beampte van die departement gesê.
– Volg Nuus24 op Twitter.
- Reuters