Kenia: Moslems help Christene ná aanvalle op kerke

2012-07-05 17:42

Nairobi – Ná die noodlottige aanvalle op twee Keniaanse kerke het gemeenskapslede pogings verskerp om te verhoed dat hul land die slagoffer word van onderlinge godsdienstige bloedvergieting wat in talle ander Afrikalande aan die gang is.

Jong Moslemmans sal binnekort begin om die sowat 30 kerke in die oostelike Keniaanse dorp Garissa te patrolleer.

Gewapende mans het Sondag 17 Christene in gekoördineerde aanvalle in die dorp vermoor.

Adan Wachu, die sekretaris-generaal van die hoër raad van Keniaanse Moslems, sê Christen- en Moslem-vrywilligers sal saamstaan om godsdienstige plekke te beskerm in die dele van die land wat die meeste oor godsdiens verdeel is.

“Hierdie is Kenia. Dit is nie Nigerië, Somalië of Afganistan nie,” het Wachu aan dpa gesê.

“Ons gaan nie ‘n godsdienstige konfrontasie in hierdie land hê nie. Dit is bloot 'n paar ontevrede elemente wat daarop uit is om die spanning tussen Moslems (en) Christene uit te buit."

– Volg Nuus24 op Twitter
 

- Sapa-DPA