Kaïro op 'n mespunt oor Islam-video

2012-09-14 13:14

Kaïro – Betogers en die polisie het naby die Amerikaanse ambassade in Kaïro klippe na mekaar gegooi voor betogings deur Moslems uit protes teen 'n video wat glo beledigend is teenoor Islam.

Sekuriteitsmagte het traangas afgevuur in 'n poging om betogers uitmekaar te jaag. Hulle het ook doringdraad en betonversperrings in strate geplaas wat tot by die ambassade in die middestad van Kaïro lei.

Meer as 250 mense is Donderdag volgens die gesondheidsministerie en medici beseer in die felste botsings sedert Mohammed Morsi in Junie Egipte se eerste Islamitiese president geword het.

Minstens 40 mense is sedertien aangekeer.

Islamiete beplan Vrydag 'n groot betoging op Tahrir-plein.

Morsi, wat Vrydag in Italië was, het Egiptenare gevra om nie ambassades aan te val nie.

– Volg Nuus24 op Twitter.

 



 

- Sapa-DPA