Ivoorkus: betogings ruk hoofstad
2010-12-16 22:42
Abidjan - Geweervuur en ontploffings het die de-facto hoofstad van die Ivoorkus, Abidjan, geruk terwyl Laurent Gbagbo weier om Alassane Ouattara as dié land se nuwe president te erken.
Vier mense het Donderdag gesterf en daar bestaan nou vrese dat dié geweld in ‘n burgeroorlog kan ontaard.
Hoewel die dodetal wat deur ‘n senior opposisie lid Amadou Coulibaly as 18 gegee is, nie bevestig kon word nie, het ‘n joernalis van AP gesê hy het ten minste drie lyke in een woonbuurt gesien.
Die bloedvergieting is deel van ‘n gewaagde poging deur Ouattara om beheer oor staatsinstansies te kry.
Ontpoffings kon naby die Golf Hotel, wat deur die Verenigde Nasies (VN) bewaak word en van waar Ouattara poog om te regeer, gehoor word. Terselfdertyd regeer Gbagbo vanuit sy presidensiële paleis.
Ouattara beplan Vrydag ‘n tweede optog om regeringsgeboue oor te neem en ‘n kabinetsvergadering te reël.
“Die volgende twee dae gaan baie dinge bepaal. Dit is alles of niks,” het Jean-Claude N’dri, ‘n verkoopsman in die Treichville woonbuurt gesê.
Quattara, wie se verkiesing as president deur die VN, Amerika, Frankryk én Afrika Unie erken word, het sy ondersteuners gevra om hom te help om beheer oor die land se staatsinstansies te kry.
- Volg Nuus24 op Twitter.