Interpol reik lasbrief vir Gaddafi uit
2011-09-09 13:00
Parys – Interpol het lasbriewe vir die inhegtenisname van Libië se Muammar Gaddafi, sy seun Saif al-Islam, en die intelligensiehoof Abdullah al-Senussi uitgereik.
Die internasionale strafhof (ISH) se aanklaer het die versoek Donderdag aan die organisasie gemaak.
“Wat die hoofkantoor van Interpol se algemene sekretariaat betref, is Muammar Gaddafi ‘n voortvlugtige wat volgens sy land van herkoms en die ISH in hegtenis geneem moet word. Hy moet verantwoordelik gehou word vir die ernstige aanklagte wat teen hom ingebring is,” het Ronal Noble, Interpol se sekretaris-generaal, gesê.
Die ISH het reeds in Junie lasbriewe vir die inhegtenisname van al drie uitgereik vir misdade teen die mensdom.
– Volg Nuus24 op Twitter.
- Reuters