ISH sal nie Gaddafi-lasbrief terugtrek
2011-07-08 16:39
Gaborone – Die internasionale strafhof (ISH) sal nie aan Muammar Gaddafi, die omstrede Libiese leier, se eise gehoor gee om die lasbrief vir sy inhegtenisname terug te trek voor hy sal bedank nie, het ‘n beampte Donderdag gesê.
“Dit sal afpersing wees wat ons nie gaan aanvaar nie. Ondersoeke is gedoen en die ISH het genoeg bewyse gekry om die lasbrief uit te reik. Dit moet nie gebruik word om te onderhandel oor Gaddafi se uittrede nie,” het Fatou Bensouda, die adjunk-aanklaer, gesê.
“Die Libiese owerhede moet aanvalle op die burgerlikes stop pleks om die lasbrief as voorwaarde te gebruik vir die einde aan die krisis in Libië,” het sy gesê.
Bensouda het egter ook gesê dat die Verenigde Nasies se Veiligheidsraad die mag het om die ISH te vra om ‘n saak vir 'n jaar uit te stel in die belang van geregtigheid.
“As dit gebeur sal ons saamwerk, maar nie wanneer die Libiese owerhede dit as basis vir onderhandelinge gebruik nie,” het Bensouda gesê.
– Volg Nuus24 op Twitter.
- Sapa - AFP