Huursoldate van SA ‘help Gaddafi se familie vlug’
2011-08-26 08:06
Pretoria – Minstens vyf Suid-Afrikaners was glo deel van ’n span huursoldate wat moes help om die gesin van kol. Muammar Gaddafi die laaste paar weke te beskerm.
Dié span het glo ook gehelp dat van sy familielede – onder wie moontlik sy vrou en sy dogter Aisha – uit die land kon ontsnap voordat die toevoerroetes na Tripoli verlede naweek deur opposisievegters afgesluit is.
Hulle het na verneem word ’n reuse-bedrag geld saam met hulle geneem en is glo na Tunisië geneem, van waar hulle per vliegtuig na ’n onbekende buitelandse bestemming sou gaan.
Dít is wat ’n ingeligte na aan die Suid-Afrikaanse groep Donderdag teenoor Die Burger beweer het.
Volgens hom is dié groep juis vir ’n “kort maar potensieel gevaarlike” kontrak gewerf. Almal van hulle is bewese veiligheidspesialiste met behoorlike militêre agtergrond. Hulle is nie een meer in Libië nie en dié wat die familielede help uitsmokkel het, het ná die suksesvolle uitvoering van die opdrag teruggekeer huis toe.
Volgens die bron het ’n frontmaatskappy in die buiteland die werwing van die span behartig. Dit is onbekend of dit met die stille goedkeuring van enige Afrika-regerings plaasgevind het.
Afgesien van dié groep was daar ook verskeie ander buitelanders, onder wie Suid-Afrikaners, wat die regeringsoldate teen die opposisiemagte help baklei het.
Luidens ’n onderhoud in die nuustydskrif Time dié week met ’n Kroatiese huursoldaat was heelparty van die gehuurde hande uit die voormalige Joego-Slawië en Bosnië en hul voetsoldate van Libië, Tsjad en ander Afrika-lande.
Volgens die huursoldaat was dissipline die grootste probleem onder die soldate, terwyl die militêre leiers hulle aan dwelms, drank en prostitute oorgegee het.
Dié leiers het glo vir die plesier mense doodgeskiet of hulle gedwing om Russiese roulette te speel terwyl hulle weddenskappe aangegaan het oor die uitkoms.
Hy het gesê toe hy opmerk dat “Gaddafi se Suid-Afrikaanse huursoldate hulle uit die voete begin maak”, het hy en ’n kameraad Tunisië toe gevlug.
– Volg Nuus24 op Twitter.
- Die Burger