Hoofgetuie gee kopseer in Bennett-saak
2010-01-15 13:48
Harare – Die staat se getuie in die verhoor van Roy Bennett, die Zimbabwiër wat van terrorisme aangekla word, is besig om ‘n kopseer vir die aanklaers te word.
Alhoewel die hoofgetuie vir die staat, Michael Hitschmann, onder eed getuig het dat hy Bennett wel ken, het hy hom van ‘n video-bewys distansieer waarin hy erken het dat hy gesien het hoe Bennett wapens koop.
Hitschmann het ook aangedui dat hy geen kennis dra van e-posse waarin hy en die aangeklaagde glo ‘n staatsgreep in Zimbabwe beplan nie.
Die staatsaanklaers beweer dat Hitschman, ‘n wapenhandelaar, deur Bennett betaal is om wapens te koop en regeringsampenare te vermoor.
Bennett, ‘n vertroueling van Morgan Tsvangirai, word aangekla van die onwettige besit van vuurwapens met die doel om aan terrorisme-aktiwiteite deel te neem.
Hitschmann het die geloofwaardigheid van die video-bewys bevraagteken en gesê hy is kort voor die opname van die video aangerand en gemartel.
“Die mense wat hierdie video gemaak het, is dieselfde mense wat my gemartel het, edelagbare," het hy getuig.
Dié getuies van Hitschmann het daartoe gelei dat die staatsaanklaers Bennett se regspan daarvan beskuldig dat hulle Hitschmann beïnvloed en dat Hitshmann hom nou aan die kant van Bennett skaar.
Die staat wil hom nou as getuie van die saak verwyder.
- Sapa