Honde-smokkelnetwerk in Namibië oopgevlek
2012-08-24 13:49
Windhoek – Interpol in Suid-Afrika het bekend gemaak dat hy saam met Namibië en Angola werk om die beweerde smokkelnet van honde stop te sit.
Twee Angolese mans is al in Angola in hegtenis geneem by Oshikango in verband met die smokkelary van sowat 15 honde. Interpol is ook opsoek na nog mans vroeër met 10 honde deur die grens geglip het, het die Republikein berig.
Adj.komm Abner Agas, koördineerder van misdaadondersoeke in die Ohangwenastreek, het bevestig dat twee mans in hegtenis geneem is, terwyl nog vermeende smokkelaars se name aan die polisie bekend is.
Kapt. Dennis Adriao, nasionale woordvoerder van Interpol in Suid- Afrika, het by navraag gesê drie lande is reeds by die ondersoek betrek.
“’n Grootskaalse ondersoek is aan die gang. Interpol in Suid-Afrika werk met Namibië en Angola saam om die beweerde smokkelary met gesteelde honde te ondersoek.”
Van die honde is glo in Kaapstad gesteel.
Altesaam drie voertuie wat met honde volgelaai was het sedert die naweek al die grens na Angola probeer oorsteek. Die honde is glo in Suid-Afrika en Namibië gesteel.
‘n Jeep Cherokke wat tien honde met ‘n sleepwa vervoer het, het die polisie ontglip en is glo op pad na Luanda.
Twee ander voertuie, ‘n Bantam- en ‘n Corsa-bakkie, is in Angola gekonfiskeer. Die Bantam het glo eers CA-registrasienommers opgehad, maar is later met CY-registrasienommers vervang.
Intussen word dié 15 vermaerde honde deur ‘n gesin van Oshikango omgesien. Daar is ook bevestig dat verskeie besighede al kos vir die honde geskenk het.
Volgens Margherita Visser, wat saam haar twee dogter en ‘n vriend van die gesin, na die honde omsien is sy ten aanskoue van grensbeamptes teen ‘n muur vasgedruk deur ‘n Angolese burger wat beweer het hy is die wettige eienaar van die honde.
“Toe ek een van die mans in aanhouding vra hoekom hy met die honde smokkel, het hy gesê hy doen dit vir die geld.”
Volgens Visser word die honde vir R40 000 en meer in Angola verkoop.
Die Suid-Afrikaanse polisie by Vioolsdrif het einde verlede jaar vier Angolese mans in hegtenis geneem wat met ’n toe sleepwaentjie vol honde van Kaapstad deur Namibië na Angola onderweg was. Twintig honde is gekonfiskeer.
Lees hier meer
– Volg Nuus24 op Twitter
