Hof hoor Zim-getuie is 'gemartel'
2010-01-26 04:36
Harare – Zimbabwe se hooggeregshof het Maandag die getuienis van 'n sleutelgetuie in die saak teen Roy Bennett uitgegooi nadat die man in die hof gesê het hy is gemartel sodat hy vals getuienis sou lewer.
Bennett is die tesourier van eerste minister Morgan Tsvangirai se party, die Movement for Democratic Change (MDC), en sy voortdurende hofsaak is een van die redes waarom die huidige magsdeel-ooreenkoms tussen die MDC en president Robert Mugabe se Zanu-PF onder druk verkeer.
Die getuie, Peter Hitschmann, is saam met Bennett aangekla van sameswering om die president te vermoor, maar die klag teen Hitschmann is later verminder na die onwettige besit van vuurwapens.
Hy is as hoofgetuie teen Bennett geroep, maar het in die hof die land se sekuriteitsmagte daarvan beskuldig dat hulle hom gemartel het sodat hy 'n verklaring teen Bennett sou aflê.
–Sapa-AFP