Herrie oor gholfbaan in Uganda
2010-11-23 03:50
Kampala - Omgewingskativiste in Uganda het Maandag laat weet hulle gaan 'n projek om 'n gholfbaan in die land se bekendste park te bou, teenstaan.
Hierdie gholfbaan-projek het egter die ondersteuning van die land se president Yoweri Museveni. Hy het opdrag gegee aan die Uganda Natuurowerhede (UWA) om toe te laat dat die Madhvani-groep die baan bou binne die Murchison-valle Nasionale Park.
"Ons sal doen wat ook al nodig is - al beteken dit regstappe. Ons sál die ontwikkeling keer," het Frank Muramuzi, hoof van Uganda se Vereniging van Professionele Omgewingsaktiviste (NAPE) aan AFP gesê.
Luidens 'n verslag wat op 17 November uit die president se kantoor gestuur is, het Museveni gesê "daar is niks fout met 'n gholfbaan nie.
"Gholf besoedel nie. Dis nie 'n fabriek wat gasse vrylaat nie, dis net gras. Hierdie moet uitgesorteer word. Sê vir die UWA ek wil dit uitgevoer hê," het die president oor die projek laat weet.
Volgens die Madhvani-groep se webblad, strek hul belange in Uganda oor die R1,4 miljard, waaronder 'n paar lodges tel.
Muramuzi is van mening die gholfbaan sal 'n negatiewe impak hê op diere se wievelde.
Hy meen ook dat, indien die projek voortgaan, dit 'n bewys is dat Uganda se natuur-owerhede magteloos is teen die regering.
"Hierdie is 'n land met wette. Om iets soos hierdie te doen, benodig jy 'n omgewingsimpakstudie. Hier is dit nog nie die geval nie," aldus Muramuzi.
Volg Nuus24 op Twitter.