Heerser se graf opgeknap
2009-11-10 13:49
Kaïro - Die Egiptiese Raad vir Antikwiteite (SCA) en die Getty Bewaringsinstituut van Kaliforinë, het ‘n vyfjaarplan aangekondig om die graftombe van Tutankhamun te restoureer.
Die Egiptiese regering en die instituut het al in die verlede saamgewerk om ander graftombes te bewaar.
Hulle het ook al lugdigte kaste vir van Egipte se mummies verskaf.
Sedert argeoloë Tutankhamun se graftombe in 1922 ontdek het, is die wêreld in vervoering met dié jong koning se goue maskers en kunsvoorwerpe.
Waarnemers is egter al jare lank bewus van bruin kolle teen die mure van die vier-vertrek graftombe.
Dié kolle bedreig die waardevolle tonele en hiërogliewe teen die mure van die graftombe.
“As ek dink aan Koning Tut se graf, dan dink ek aan daai bruin kolle, wat geen wetenskaplike nog kon verduidelik nie,” het Zahi Hawass, hoof van die SCA, gesê.
“Ek is net bly dat die Getty daarna gaan omsien en die tonele teen die muur gaan red.”
Die plan sal twee jaar se waarneming insluit om die rede vir die agteruitgang te bepaal.
Daarna sal hulle ongeveer drie jaar vat om die oplossing te implementeer.
- Sapa