Guinee-Bissau vra hulp met stryd teen dwelms

2012-09-25 15:09

Bissau – Guinee-Bissau, 'n middelpunt van internasionale dwelmhandel, sukkel om sy stryd teen georganiseerde misdaad te wen, het sy waarnemende president Maandag gesê.

“Guinee-Bissau kan nie dwelmhandel alleen aanpak nie,” het Manuel Serifo Nhamadjo, die land se waarnemende president, gesê.

“Ek vra weereens vir die internasionale gemeenskap om ons te help om hierdie euwel te stop.”

Guinee-Bissau word al lank gereken as ‘n sleutelplatform vir die smokkel van kokaïen en ander dwelms vanaf Suid-Amerika na Europa. Verskeie verslae het al top- militêre personeel van betrokkenheid by dié netwerke beskuldig.

Sedert die land se onafhanklikwording in 1974 het konstante konflik in sy grondgebied geheers. Nie een president het al sy volle termyn gedien nie.

Nhamadjo, wat ‘n militêre parade bygewoon het vir Onafhanklikheidsdag-vieringe, het bygevoeg dat sy regering nie deur die weermag beheer word nie.

Hy het ook gevra dat die internasionale gemeenskap help om die komende verkiesing te reël.

– Volg Nuus24 op Twitter
 

- AFP