Green Berets gaan help in Uganda
2011-10-18 07:00
Pretoria – Uganda en Amerika het met ’n omvattende militêre veldtog begin om een van Afrika se wreedste terroriste, Joseph Kony, en sy sogenaamde Lord’s Resistance Army (LRA) te verslaan.
Die Amerikaanse weermag stuur in opdrag van pres. Barack Obama 100 lede van sy elite-spesialiseenheid, die Green Berets, na die noorde van Uganda om dié land se soldate vir die komende veldtog op te lei.
Die voorhoede van dié gevegseenheid het gister in Uganda aangekom.
Die Amerikaanse soldate staan onder die bevel van Afrika se sogenaamde Afrika-kommandement (Afcomm) wat sy hoofkwartier in Stuttgart, Duitsland, het.
Kony, wat ’n lasbrief vir sy inhegtenisneming van die Internasionale Strafhof sedert 2008 ontduik, voer al byna twee dekades lank ’n skrikbewind in die noorde van Uganda, die Suid-Soedan, die Demokratiese Republiek van die Kongo en die Sentraal-Afrikaanse Republiek.
Afcomm het in ’n verklaring gesê die hoofdoel is om Kony en sy bevelvoerders aan te keer of van die slagveld te verwyder.
Stappe word ook gedoen om die plaaslike bevolkings in al vier lande te beskerm en om die LRA te ontbind.
Dis die eerste keer sedert die mislukte Amerikaanse aanval op Somaliese rebelle in Mogadisjoe in 1993 dat Amerika gevegsmagte amptelik op Afrika-bodem ontplooi.
Kony, ’n Ugandees wat na bewering militêre en geldelike steun van die Soedanse regering kry, word daarvan beskuldig dat hy in 2008 alleen meer as 2 400 mense vermoor en 3 400 ontvoer en vermink het.
Meer as 380 000 mense is tot dusver in mislukte militêre optredes deur en teen hom inheems ontwrig in die gebied aan en teenoor die Ugandese noordgrens.
Die ontplooiing van die Amerikaanse soldate as “waarnemers in volle gevegsmondering” word op versoek van die Ugandese regering en met die “kennisname” van die Afrika-Unie gedoen.
– Volg Nuus24 op Twitter
- Beeld