Ghana se president begrawe
2012-08-10 19:34
Accra – Duisende mense, insluitende verskeie staatshoofde, het in Accra, Ghana, se Independence Square bymekaar gekom vir die begrafnis van pres. John Atta Mills.
Sy lyk was Vrydag vir die laaste keer te siene voor dit in ‘n swart limousine weggevat is ná begrafnis onder militêre wag.
Van die staatshoofde wat Mills se liggaam besoek het voor die begrafnis, sluit in die Ivoorkus se Alassane Quattara, Ellen Johnson Sirleaf van Liberië sowel as die leiers van Benin en Togo.
Amerika se minister van buitelandse sake, Hillary Clinton, het die begrafnis bygewoon.
“Hy was soos ‘n broer vir my. Ek gaan hom mis,” het Togo se president, Faure Gnassingbe, gesê.
Benin se leier, en ook op die oomblik die Afrika Unie se voorsitter, Thomas Boni Yayi, het Mills as “passievol oor vrede in Afrika beskryf.”
Sy dood op 24 Julie het as ‘n skok gekom, ten spyte van gerugte dat hy siek was en aan keelkanker gely het.
Organiseerders sê 10 000 mense word verwag om die seremonie by te woon. Mills se lyk sal daarna na Osu-kasteel geneem word om begrawe te word.
Vir diegene wat nie die seremonie gaan kan bywoon nie, is daar grootskerm TV’s buite die Independence Square opgerig. Die seremonie sal ook op TV uitgesaai word.
“Vandag is die hartseerste dag,” het Akua Danso, ‘n 80-jarige voormalige onderwyser, gesê.
“Ek het al talle president sien kom en gaan, maar hy was die beste. Baie nederig. Ek wens ek kon hom ontmoet het sodat ek hom kon sê watse juweel hy was.”
Volg Nuus24 op Twitter
- Sapa - AFP
