Geweld in Kaïro wêreldwyd veroordeel
2011-11-24 07:06
Johannesburg – Die dood van 37 Egiptiese betogers en die verwonding van meer as 2 000 ander in die strate van veral Kaïro en Alexandrië is Woensdag wêreldwyd veroordeel.
Navi Pillay van Suid-Afrika het Woensdag in haar hoedanigheid as die Verenigde Nasies se hoëkommissaris vir menseregte ’n beroep op die Egiptiese militêre regime gedoen om onmiddellik sy aanvalle op die duisende betogers op Tahrir-plein te staak.
In ’n verklaring wat in Genève uitgereik is, vra Pillay dat beheer so gou moontlik aan ’n volwaardige burgerlike regering oorgegee word.
“Pleks daarvan dat die Egiptiese weermag veiligheid in die land help verbeter om die oorgang na ’n volle demokrasie te vergemaklik, maak hy die situasie al hoe meer plofbaar.”
Pillay het daarop aangedring dat diegene wat vir die geweld verantwoordelik is aan die man gebring word. Sy het ook gevra dat die huidige noodtoestand opgehef word en ’n einde gemaak word aan die volgehoue aanhouding en marteling van politieke gevangenes.
Soortgelyke veroordeling van die geweld het Woensdag gekom van die VSA, Brittanje, die Arabiese Bond en die Europese Unie. – Sapa-Reuters
Volg Nuus24 op Twitter
- Die Burger