Gesondheidsorg benodig in Soedan
2009-11-07 01:34
Geneva – Drie kwart van Suid Soedan se inwoners het nie toegang tot mediese sorg nie, terwyl 10% van alle kinders hier en in Darfoer sterf, voor hul eerste verjaarsdag, het die Wêreldgesondheidsorganisasie (WGO) gesê.
Mohammad Abdur Rab, verteenwoordiger van die WGO vir Soedan, het gewaarsku dat ‘n tekort aan gesondheidswerkers en medikasie, duisende mense se lewens in gevaar stel.
In die weste van Darfoer waar ‘n na raming 4 miljoen mense uit hul huise gesit is, is 15% van kinders wangevoed, en siektes soos malarië, meningitis en diarreë kom algemeen daar voor.
In die suide van die land is daar tans 2 000 swanger vroue wat sterf met elke 100 000 geboortes.
“Hierdie syfers is van die hoogstes in die wêreld,” het Abdur Rab gesê.
Daar is tien gekwalifiseerde verpleegsters in Suid Soedan, wat ‘n populasie van 8 miljoen het.
Die klimaat maak dinge ook moeilik, omdat mediese bystandsentrums tydens seisoenale reënval nie toeganklik is nie, terwyl mense in die droeë seisoen ure moet loop om by ‘n gesondheidsfasiliteit uit te kom.
Volgens Abdur Rab moet donateurs hul ondersteuning vir bystanddienste in Soedan vermeerder, met spesiale aandag aan sekondêre en tersiêre sentrums.
Nie-regeringsorganisasies verskaf byna 80% van alle bystand gesondheidsdienste in die streek, wat slegs 25% van die populasie bereik.
In Darfoer, waar die regering 13 buitelandse organisasies verban het en drie plaaslike bystandsgroepe toegemaak het, word ekstra versterkings benodig om die uitbreek van dodelike siektes soos cholera te voorkom.
- Reuters