Gesondheid glo rede vir Bob se reise
2011-10-03 07:00
Harare. – Pres. Robert Mugabe (87) van Zimbabwe is die sewende keer in die laaste nege maande Asië toe vir mediese behandeling, het dié land se minister van inligting Sondag gesê.
Mugabe het laasweek Singapoer toe gereis “vir ’n opvolg ná ’n vorige oogoperasie”.
Luidens diplomatieke notas wat in September deur die klikwebwerf WikiLeaks onthul is, ly Mugabe glo aan prostaatkanker wat teen 2013 tot sy dood sal lei.
Gideon Gono, goewerneur van Zimbabwe se sentrale bank en Mugabe se persoonlike bankier, het dié bewerings glo in Junie 2008 teenoor James McGee, ’n voormalige Amerikaanse ambassadeur, gemaak.
Ondanks bespiegeling, het amptenare van Zanu-PF tot dusver geweier om te erken dat hy gesondheidsprobleme het.
George Charamba, presidensiële woordvoerder, het vroeër gesê die reise wat Mugabe en sy vrou, Grace, vanjaar na Asië onderneem het, is weens Mugabe se katarak-operasie in Januarie en behandeling vir rugbeserings wat sy vrou opgedoen het nadat sy in hul herehuis in Harare geval het.
Die staatsmedia het later die berigte oor sy mediese besoek aan Asië ontken en gesê hy het vir sy dogter Bona gaan kuier.
– Volg Nuus24 op Twitter
- Sapa-DPA