Geen terugkeer vir Zim-dollar
2009-10-12 13:10
Harare - Zimbabwe se minister van finansies, Tendai Biti, het gedreig om te bedank as hy gevra sou word om die Zim-dollar, wat nie meer gesirkuleer word nie ten einde verdere hiperinflasie te keer, weer in gebruik te neem.
"As iemand my sou vra om die Zim-dollar terug te bring, sal daar 'n vakante pos op die sesde verdieping van die regeringskompleks wees en ek sal teruggaan na my prokureursfirma," het die staatskoerant, The Herald, Biti aangehaal.
"Die Zim-dollar het 'n instrument van diefstal geword wat ons nie kan toelaat nie", het Biti gesê.
Hy sê debat rondom die moontlike terugkeer van die Zim-dollar moet eers in November 2010 begin.
Die nuwe regering moes van die Zim-dollar afstand doen en buitelandse valuta aanvaar toe weghol-inflasie by tye drie prysverhogings per dag genoodsaak het.
- Sapa-AFP