'Geen gemene spel' in Zim-generaal se dood
2012-03-29 14:00
Harare – 'n Geregtelike doodsondersoek het getoon daar was geen gemene spel betrokke by die dood van 'n invloedryke Zimbabwiese generaal met bande met pres. Robert Mugabe se party nie, het die staatsmedia Donderdag berig.
Genl. Solomon Mujuru, 66, man van die land se adjunkpresident, se verkoolde lyk is verlede jaar in sy plaashuis suid van Harare gevind ná dit deur 'n brand vernietig is.
The Herald, Zimbabwe se grootste dagblad, wat deur Mugabe-lojaliste beheer word, het Donderdag oor Johannes Tomana, die prokureur-generaal, se bevindings berig ná die ondersoek, wat in Februarie voltooi is.
Tomana het die bevindings as "goed-beredeneerd" beskryf, en gesê die saak is, wat hom betref, gesluit.
Mujuru se familie het op die ondersoek aangedring weens bespiegeling dat die generaal deur politieke opponente vermoor is.
Monsters van die oorskot en as uit die huis het volgens die ondersoek nie getoon dat dit met plofstof of vlambare vloeistof in aanraking gekom het nie.
Suid-Afrikaanse patoloë het egter gewaarsku dat die monsters nie korrek hanteer is nie. 'n Werker op die plaas het ook gesê dat sy geweerskote gehoor het voor die brand uitgebreek het, en ander getuies het berig dat vlamme met vreemde kleure uit die lyk opgegaan het.
– Volg Nuus24 op Twitter.
- Sapa - AP
