Gbagbo verskyn voor internasionale strafhof
2011-12-05 08:34
Den Haag – Laurent Gbagbo, voormalige leier van die Ivoorkus, gaan Maandag vir die eerste keer voor regters van die internasionale strafhof (ISH) verskyn oor sy rol in die dodelike geweld ná verlede jaar se verkiesing.
Gbagbo, die eerste voormalige president wat voor die ISH gedaag word, sal op vier aanklagte van misdade teen die mensdom, insluitend moord en verkragting, teregstaan. Volgens die Verenigde Nasies is sowat 3 000 mense tydens die verkiesingsgeweld dood.
Gbagbo sal omstreeks 14:00 in die hof verskyn waarna die regters sy identiteit sal bevestig en sy vermeende misdade en regte volgens die hof se verdrag, die Verdrag van Rome, sal voorlees.
Regter Silvia Fernandez de Gurmendi sal ook ‘n datum vasstel vir ‘n verhoor waartydens Gbagbo se misdade bevestig sal word.
Aanklaers sal daarna die regters moet oortuig dat hulle genoeg bewyse het om Gbagbo te vervolg.
– Volg Nuus24 op Twitter.
- Sapa - AFP