Gbagbo se seun ook hof toe
2011-08-11 11:15
Abidjan – Altesaam 12 mense, insluitend Laurent Gbagbo se seun, is in die Ivoorkus in hegtenis geneem in verband met hulle beweerde betrokkenheid by ses maande van geweld ná die land se November-verkiesing, het 'n beampte gesê.
Noel Dje, ‘n woordvoerder van die polisie in Abidjan, het bevestig dat Michel Gbagbo sowel as Pascal Affi N’Guessan, voormalige hoof van die Ivooriaanse Populêre Front (FPI), saam met 10 ander mense in hegtenis geneem is.
Van die gevangenes kan met tot 20 jaar se tronkstraf gevonnis word vir aanklagte van onder andere die bedreiging van staatsveiligheid en rebellie.
Verhoordatums is nog nie bekend nie.
Volgens Dje sal Laurent Gbagbo en sy vrou ook verhoor word, maar hulle saak sal deur die departement van binnelandse sake hanteer word.
Gbagbo het geweier om uit te tree nadat hy die November-verkiesing teenoor Alassane Ouattara verloor het. Dit het aanleiding gegee tot 'n periode van geweld waartydens duisende mense in die Ivoorkus dood is.
– Volg Nuus24 op Twitter.
- Sapa - AP