Gbagbo se party onttrek uit verkiesingskommissie
2011-09-22 09:28
Abidjan – Laurent Gbagbo, die voormalige president van die Ivoorkus, se party het Woensdag uit dié land se verkiesingskommissie onttrek.
Die kommissie is tans besig om voor te berei vir 'n verkiesing in Desember.
Die Ivoriaanse Populêre Front (FPI) “onttrek sy deelname aan alle aktiwiteite van die Onafhanklike Verkiesingskommissie,” het Laurent Akoun, die party se sekretaris-generaal, in ‘n brief aan Youssouf Bakayoko, die kommissie se voorsitter, gesê.
Die Ivoorkus het onlangs gebuk gegaan onder ‘n gewelddadige verkiesingskrisis nadat Gbagbo geweier het om sy nederlaag in die verkiesing in November 2010 te aanvaar.
Gbagbo het die tuig uiteindelik in April neergelê en hy en sy vrou is deur Alassane Ouattara, die nuwe president, se magte inhegtenis geneem.
Die FPI was voorheen vir tien jaar die heersers van die Ivoorkus.
– Volg Nuus24 op Twitter.
- Sapa - AFP