Gbagbo beskuldig Frankryk van sluipmoordpoging
2011-09-16 17:59
Parys – Laurent Gbagbo, die voormalige president van die Ivoorkus, het die Franse weermag van ‘n sluipmoordpoging tydens die April-offensief om hom te ontsetel, beskuldig, het regsbronne Donderdag gesê.
Frankryk en die Verenigde Nasies het die magte van Alassane Ouattara, Gbagbo se teenstander en die huidige president, ondersteun tydens die offensief wat Gbagbo en sy vrou, Simone, se inhegtenisname tot gevolg gehad het.
Op daardie stadium het erge geweld reeds vier maande in die land geheers nadat Gbagbo geweier het om die tuig neer te lê na sy nederlaag in die November-verkiesing.
‘n Ondersoekende landdros is aangestel omdat die aanklag by ‘n militêre hof in Parys ingedien is.
Frankryk het sy aandeel in die 11 April-aanval verdedig en gesê sy troepe en die van die Verenigde Nasies in die Ivoorkus het slegs ‘n ondersteunende rol gespeel.
“Op geen gegewe tyd het die Franse magte die presidensiële tuine of tuiste (waar Gbagbo geskuil het) binnegegaan nie,” het kol. Thierry Burkhard, ‘n woordvoerder vir die Franse weermag, gesê.
Gbagbo en sy vrou is van “ekonomiese misdade” aangekla. Pres. Ouattara het versoek dat hulle deur die internasionale strafhof vervolg word.
– Volg Nuus24 op Twitter.
- Sapa - AFP