Gbagbo aan internasionale strafhof uitgelewer
2011-11-30 07:07
Den Haag – Laurent Gbagbo, voormalige leier van Ivoorkus, is Woensdag na Nederland geneem om aan die internasionale strafhof uitgelewer te word.
Gbagbo sal verhoor word vir geweld ná die verkiesing in dié land wat die lewens van 3 000 mense geëis het.
'n Vliegtuig waarin Gbagbo gevlieg het, het kort voor 05:00 Woensdagoggend by Rotterdam-lughawe geland, het ANP berig.
Gbagbo sal daarvandaan na die internasionale strafhof se aanhoudingsfasiliteite in Den Haag geneem word.
Die 66-jarige Gbagbo is Dinsdag van sy oorplasing in kennis gestel toe 'n internasionale lasbrief van die internasionale strafhof vir sy inhegtenisneming uitgereik is , het Jean Gbougnon, een van sy prokureurs, aan AFP gesê.
Gbagbo sal die eerste oud-staatshoof wees wat aan die internasionale strafhof uitgelewer word.
– Volg Nuus24 op Twitter